تحدّي و قيمة!

السلام عليكم ورحمة الله فكرة نشاط لطيفة وخفيفة وتخلق أجواء مابين المتعة والتحدي والفائدة أتمنى تعجبكم وتحصلون ثمرتها مثل ما حصلتها مع طالباتي

طبعاً مثل ماقلت لكم سابقاً أن طالباتي صارحوني برغبتهم أني أجعل الفائدة أو القيمة اللي أبي أوصلها لهم بقالب مرح أو تحدي أو منافسة بينهم حتى تحفزهم أكثر وتغيّر أجواؤهم وفكرة اليوم هي أحد الرغبات اللي نفذتها لهم ونتيجتها جداً مذهلة وحبيتها

الفكرة:

حتى أبسط لكم مفهومها بإختصار هي مثل : التركيبة مثل ماتشوفون بالصورة قدامكم 4 أوراق مطبوعة + أوراق مقصوصة بمعنى أني طبعت 8 أوراق .. 4 خليتهم مثل ماتشوفون والـ 4 الثانية قصصتهم وبعثرتهم وتلاحظون التصاميم قريبة لبعض لكن العبارة وحدة مكررة!

الطالبات 4 مجموعات .. قلت لهم كل مجموعة لهم لون يميزهم : أحمر , أصفر , أزرق , أخضر وحطيت الأوراق المطبوعة الجاهزة على كل طاولة بحيث تساعدهم على إكمال التركيب

وقبل أدخل عليهم بالحصة فرزت الأوراق المقصوصة ولونتها بالخلف مثلاً أوراق المجموعة الأولى: حطيت إشارة باللون الأحمر خلف كل أوراقهم المقصوصة والمجموعة الثانية: كل أوراقهم بالخلف حطيت إشارة باللون الأصفر .. وهكذا ثم بعثرتها بالساحة بكل مكان و زاوية..

بعدها طلبت من كل مجموعة: يختارون طالبتين لمهمة البحث عن الأوراق بحيث ينطلقون ويبحثون عن الأوراق ويشيكون عليها من الخلف هل هي تحمل إشارة لونهم ولالا وبقية المجموعة يرتبون الأوراق مثل الورقة الأساسية اللي عندهم بالطاولة يشترط : مافيه أي صوت بالساحة وإذا طلع صوت يكون خصم على المجموعة أيضاً الكل يلتزم في مكانه ويراقب من بعيد فقط صراحة الشروط تعذيب ههههههههه صاروا يتحركون ويقومون ويجلسون ع الصااامت الأشكال تحفة صدق والضحك حكاية ثانية الأجواء جداً ممتعة وانبسطت معهم كثيييير مع عفويتهم وحماسهم

بعد الإنتهاء وإعلان المجموعة الفائزة ومنحها النقاط المتفقين عليها مسبقاً بقيّة الوقت نقاش على العبارة المكتوبة على الأوراق: " فما الإنسان إلا حُلمٌ وأمل .. وما الحياة إلا مبدأ وقيمة " طلبت منهم يفسرون لي كيف فهموا هذه العبارة من وجهة نظرهم ثم شرحتها ووصلت مقصدي منها وأهميّة الحُلم والأمل في حياة الإنسان للسعي وخوض الحياة أيضاً أن المبدأ والقيم هي رادع لكثير من الفتن والتقلبات اللي تعترض طريقنا دعمتها بأمثلة للإقناع والتوضيح

وهذا يعتمد على المعلمة وشخصيات طالباتها بإمكانك تأخذين الفكرة عامةً .. وتمحورين المحتوى حسب اللي يناسب طالباتك

لمن ترغب بطباعة التصاميم الأربعة ..

تضغط على الصورة حتى ينقلها للرابط مباشرة

بالتوفيق للجميع