مُنافسات غيميّة

✨

🌿💛 أسعد الله أوقاتكم بكلّ الحُب والرضا عودة مُشرقة مع فكرة ملهمة ومشوّقة للطالبات

أحب أذكر بالبداية للي ما قرأت التدوينات السابقة : أني مشرفة تربويّة أقدم دورات وأنشطة لجميع حِلق الدار فئة "متوسط وثانوي" وعلى هذا الأساس قسمتهم لمجموعات عندي بالقاعة بكل حصة نشاط ويكون تنافس بينهم جميعاً .. بحيث يكون الفوز بنهاية الترم للمجموعة الأكثر نقاط

ولأنهم طلبوا مني أشياء حركيّة وأفكار متنوعة من خلالها أقدم لهم المحتوى أو المادة والفائدة نوّعت لهم بالأفكار والطرح..وفعلاً لمست صدى هذا التنوّع بشكل كبير عليهم من ناحية التفاعل والحماس وحُب وشغف لحصة النشاط وعدد النقاط بينهم 👌😍 فـ أنصح فيها جداً , وفي هذه التدوينة أحد الأفكار :

الفكرة: عبارة عن منافسة بينهم تعتمد على سرعة البديهة وسرعة التنفيذ وهي 10 مراحل .. أطرح عليهم السؤال أو الطلب والمجموعة اللي تنتهي أول لهم النقطة 💛💛💛✨ تصوروا أنتم جمال الأجواء !! طاقات متوسط وثانوي بالتنافس والتفاعل ماشاء لله وكل مجموعة تتحدى وتتوعّد غيرها 😅 مع ضحك وردّات فعل وحتى - الصراخ - اللي بدون شعور عند الفوز أو الهزيمة كنت فاتحة المجال لهم وكأنهم في لقاء مع أقاربهم في إجازة نهاية الأسبوع! ودخلت معهم بالأجواء وتحمست معهم .. وكنت متقصدة هذا الشيء لأن هذا القرب له أثره عليهم جداً بحيث يكون التعامل معهم ساعةً وساعة , مرة جدّ وحزم ومرة مرح وبساطة ومرة اتزان وهدوء حتى ترتاح لك الطالبة وتشعر أنك أنت قريبة منها .. فـ يسهل عليك التعامل والتأثير بشكل كبير

خلونا ننطلق للتفاصيل اللي صارت معنا وأنتم بإمكانكم تضيفون أو تحذفون منها 👌💛 حسب مايناسب طالباتكم وشخصياتهم

البداية كانت سهلة حتى يدخلون بالأجواء التنافسيّة وتكون تشويق لهم لأن أحد المجموعات بدأت بتجميع النقاط قبلهم!

الفكرة هنا طلبت من كل مجموعة تطلع لنا رسامة وكنت أنا مجهزة لهم طاولة بزاوية بعيدة عن اجواء المنافسة وطلبت منهم: يرسمون لي رسمة يجسدون من خلالها معنى هذه العبارة " كُن شيئاً جميلاً فالجميلُ لايُنسى" قلت من خلال خيالك وإبداعك ارسمي شي يوحي لهذا المعنى وبالنهاية بنشوف مين أقرب وحدة للمعنى وتحصل على النقاط 🌈✨ النتيجة مذهلة جداً ماشاء الله .. ومنحتهم جميعاً نقاط كاملة لأن كل معنى متفرد بالجمال عن غيره وحبيت ربطهم وفكرتهم للواقع

هنا الفكرة على مرحلتين: كنت موزعة 4 بطاقات على عددهم بالساحة الخارجية .. وطلعت من كل مجموعة طالبة المرحلة الأولى قلت: الآن تطلعون تبحثون عنها وعادي اذا شفتوا أكثر من وحدة تاخذونها لأن اللي معها أكثر من بطاقة بتكسب نقاط أكثر. المرحلة الثانية : اللي معهم بطاقات كسبوا نقاط .. والمطلوب منهم الآن يختارون أي مجموعة غير مجموعتهم ويطلبون منهم أي طلب أو سؤال .. إن جاوبوا صح فإنه للمجموعة اللي جاوبت نقاط والمجموعة اللي سألت مالهم شيء وإن ماجاوبوا صح فإنهم نفسهم يخسرون من نقاطهم الأساسية اللي بالجدول عندي ف التفاااااعل وقتها غير معقول 😅😅 مابين أن البنت تختار المجموعة وتقول بجيب سؤال صعب عشان أخسرهم ومابين تحديات أنه حنا نقدر .. ومابين عادي ماتهمنا النقاط هذي بنجيب غيرها وووو 💛💛💛✨ روعة الأجواء لحظتها مثيرة ومشوقة

التنويع بالمراحل مطلب مهم وضروري بحيث نجمع مابين المرح والفائدة والاثر طلبت من كل مجموعة طالبة وحدة تذكر لنا مبادرتها بإسعاد غيرها وكيف الأثر ع غيرها وعليها هي والفكرة الأفضل تحصل لمجموعتها نقاط .. 👌😍 وحقيقة أنبهرت جداً من اللي سمعته من أفكار ومبادرات ماشاء الله فعلاً هذا الجيل يحتاج من يسمع لهم ويكتشف جمالهم ولطافة قلوبهم ولهذا فتحت مجال للنقاش وسمعت مشاركات أكثر وتعليقات من عدة جهات بحيث يؤثرون على بعضهم وبالنهاية الجميع حصل على نقاط كاملة مع التحفيز والتشجيع على الأستمرار

😃😁 جمال الفقرة هنا أقدر أقول ينحصر بـ " السنع و الخطوط" قلت لهم بعد ماوزعت عليهم الأرواق والاقلام : أبي كل مجموعة تكتب لي مقادير أي طبخة مع المقادير بخط واضح وأسرع مجموعة تخلص لها النقاط أحد من الحماس نسى الطريقة وأحد مايقرأ خطه نهائياً 😶 وأحد يقول مااعرف وشي الطبخة بس المقادير والطريقة صح والله استاذة تنوّع المهارات بهذه الفئة مدهش .. شئ لطيف تشوفون بنت بالمتوسط تحب تسوي حلا أو صينية موالح! ف هذه الفكرة للتنويع والتحفيز أيضاً .. وقلت لهم من باب المداعبة: 🙊😃 نهاية الفصل ضروري تسوون لي بوفيه هنا ماراح أجيب لكم ضيافة!

هنا الفكرة واضحة لكم وبسيطة حتى يتهيئون للي بعدها

هنا الفكرة لسرعة البديهة وفتحت لهم المجال بالمحاولة 😍👌 وكانت جداً ممتعة وأضافت للأجواء مرح وتحدّي

نرجع لفكرة التنويع مطلب هذا السؤال حتى يساعدهم ويثبت عندهم المعلومة بما أنهم تحفيظ وفعلاً اندهشت من سرعة التجاوب وتقارب الأساليب ,, واهتمامهم بالسماع 💛💛✨ كل مجموعة تسمع خطوات غيرها حتى تستفيد .. هذه المشاهد تزيدني فخر بشكل كبير

هنا قلت لهم : أبقول لكم مقادير طبخة معروفة بتكلم بسرعة وأبنقص منها أحد المقادير أول مجموعة تكتشف اللي ناقص لهم النقطة 😅💛 طبعاً قلت لهم طريقة الرز ونقصت الماء والملح.. وماشاء الله كلهم جاوبوا بوقت واحد

الفكرة هنا قلت: 😅💔 ابي أسرع بنت من كل المجموعات وحدة تجي توقف عندي << طبعاً صار هجووووم ثم قلت وأبيها تنفذ طلب .. على طووول رجعوا كلهم 😶💔.. كل القاعة ضحححك لأنهم رجعوا خايفين من الطلب راحت المبادرة والثقة ع طول قلت اختاروا وحدة وخلوها واقفة عندكم .. ثم أنا اعد 1 2 3 .. أول مايوصلون عندي أطلب منهم مباشرة طبعاً من الحماااس لجمع النقاط رفضوا .. ويطلبون مني أذكر لهم الطلب أول ✋ ف رفضت للتشويق واستمرار الحماس .. الطلب بسرعة: أول وحدة تنشد لنا أنشودة بصوت عالي ولا تتلخبط وتوقف! ردة الغعل لاتعليق!! ثنتين مو مجال الأنشاد نهائياً .. وثنتين منشدات بس ماقدروا يتذكرون شيء << تصوروا ردة فعل المجموعات وهم يعددون أسماء الأناشيد ويحفزون زميلتهم تتحرك وتنشد 😭😭😭💛 الأجووووووواء روعة روعة روعة

الحمدلله تمت المنافسة بـ روح كلها مرح وحُب وتحدي وابتسامات وطاقة عالية 😍💛🌈 وانصحكم تجربونها وتعيشون جمالها مع طالباتكم

ملاحظة: الفكرة هذه قدمتها على يومين لضيق الوقت بالبداية كانت 5 مراحل فقط , لكنهم حبّوها جداً وطلبوا مني أزيد عليها والتنافس بكل اليومين وجمال الأجواء تتضاعف وتزيد بهجة و روعة

🌿💛💛 شكراُ للجميلة عبير على التصاميم اللطيفة